¦¦§¦¦¤~ M. 0. S. h. K . I .L A ~¤¦¦§¦¦

يشرفنا الاشتراك معانا وتنورنا

احلى مشكله لاجن شباب


    مراية...ونتيجه...وساعه

    شاطر

    زائر
    زائر

    مراية...ونتيجه...وساعه

    مُساهمة من طرف زائر في الأربعاء مايو 28, 2008 1:04 am


    بسم الله الرحمن الرحيم
    السلام عليكم ورحمة الله وبركاته

    ************************************
    مراية ونتيجة وساعة..

    عندك مراية في بيتكم؟
    طب معلق نتيجة على الحيطة جنب الساعة اللي بتعد ساعات العمر؟
    معاك ورقة وقلم أو فاتح الوورد على الكمبيوتر؟
    جوّاك شجاعة كبيرة وقادر تواجه أخطر الحقائق وأشدها فزعا؟
    لو إجابتك عن كل الأسئلة اللي فاتت دي بأيوه..
    يبقى حلو قوي.. شمر بقى كم القميص وخش في الموضوع عدل
    أما لو كانت الإجابة عن نفس الأسئلة بـ: لا
    فإحم.. يبقى شمر كم القميص وخش برضه في الموضوع عدل
    *******تخيل إنك قعدت مع نفسك على انفراد بعد الفطار
    الحوار بقى هيكون شكله إيه..
    *******

    كده..؟؟


    انت: مساء الخير
    نفسك: يسعد مساك يا سيدي.. نعم أي خدمة؟
    انت: بالراحة عليّ شوية.. عادي يعني.. كنت عاوز نقعد مع بعض شوية
    نفسك: ليه يعني صاحبي.. صديقي.. خطيبي.. جوزي ومخلفة منك عيال
    انت: يا ستي ده إنتِ نفسي.. مش لازم يعني يكون فيه سبب عشان نتكلم مع بعض
    نفسك: اتفضل يا سيدي.. سمعني
    انت: مش عارف.. حاسس إن أنا غلطت لما اتخانقت مع ماما النهارده الصبح
    نفسك: مش هي يا سيدي اللي مارضيتش تديك فلوس عشان تشتري كتب الجامعة
    انت: إنتي هتستعبطي ولا إيه.. ما أنا وإنتي عارفين إني خدت منها فلوس الكتب قبل كده 3 مرات بعد ما أخدتهم من بابا 4 مرات وبرضه ماشترتش الكتب
    نفسك: آه والله في دي عندك حقك.. ما هو إنت
    اللي بتصرف فلوسك دايما على البنات، ده حتى في رمضان قال إيه بتجيب لهم
    شيكولاتة وابقوا كلوها بعد الفطار وافتكروني.. سم كده
    انت: طب خلاص خلاص هو لازم يعني تشدي عليّ كده في كل مرة.. خلاص ماعدتش هاعمل كده تاني.. بس لازم أعتذر لماما صح.. صح؟
    نفسك: طبعا.. قوم هز طولك بدل ما إنت قاعد قدامي كده.. روح يا شيخ.. جيل فاشل يقطع الخلف
    *******
    ولاّ كده؟؟


    انت: مساء الخير
    نفسك: مساء الخير يا عسل.. ما تاخد لك نفس طيب.. كح كح
    انت: لا يا ستي.. ما هو أنا أصلا جاي لك عشان كده
    نفسك وهي تنفخ الدخان في وجهك: فووووووو.. وماله يا حبيبي اتفضل اتفضل
    انت: بصراحة... أنا عاوز أبطل شرب سجاير وشيشة
    تقف نفسك في قلب الصالة وهي تضع يدها في وسطها قائلة لك: نعم يا عمر.. تبطل شرب
    انت: عمر مين يا ستي.. إنتي نسيتي اسمي ولاّ
    إيه.. وبعدين فيها إيه؟.. أيوه أنا عاوز أبطل شرب سجاير وشيشة.. بصراحة
    باصرف عليهم فلوس بالهبل وصحتي بقت زيرو.. ده أنا لما باطلع السلم بانهج
    وكأني شايل جبل المقطم على صدري.. وأنا ساكن في الدور التاني ما بالك بقى
    لو كنت ساكن في الدور الخامس ولا السادس؟
    نفسك: عادي يعني هتحس إنك شايل جبل المقطم والجبل الأخضر.. جيل مرق خيخة
    انت: قولي عليّ زي ما تقولي.. بس أنا قررت.. مافيش سجاير ولا شيشة بعد النهارده، إيه قولك بقى؟
    نفسك: خلاص يا عم إنت أدرى بنفسك.. بس اسحب لك نفس من السيجارة دي طالما هتبطل بقى
    انت: يا ستي باقول لك هابطل هابطل
    نفسك: يعني كنت كابتن مصر وهتبطل كورة ما تبطل يا سيدي.. باقول لك ده آخر نفس، مالوش تأثير يعني
    انت: تفتكري؟
    نفسك تشير لك بعلامة "كده" ثم تقدم لك السيجارة التي تلتقطها في سرعة
    أدهشتك أنت شخصيا.. لحظات ويمتلئ المكان بالدخان.. كح كح.. مش تفتح شيش
    البلكونة طيب؟
    *******شفت بقى، آدي الحوارات ولا بلاش
    عرفت ليه لازم يكون عندك في البيت ساعة ونتيجة..؟
    عشان تبص على الأيام اللي راحت من عمرك
    وعرفت ليه إنت محتاج مراية؟
    عشان تشوف فيها نفسك على حقيقتها.. وتقف قصادها وتسألها هي الأيام
    والساعات اللي راحت دي راحت في إيه؟ والأفعال اللي قمت بيها كانت صح ولا
    غلط؟
    *******



    خايف؟

    ماتخافش.. صحيح إن كتير من الحكماء قالوا إن أكبر عدو ممكن تقابله في
    حياتك هو نفسك، وصحيح كلنا عارفين إن النفس -عادة- ما تأمر صاحبها بالسوء،
    بس خليك شجاع،

    واقعد مع نفسك وحاسبها بالورقة والقلم
    لقيت نفسك غلطانعادي ماتزعلش.. اعرف إنك غلطت وحاول تصحح الغلط ده لو تقدر
    ماقدرتش والوقت فات؟.. خليك فاكر وأكيد عمرك ما هتغلط نفس الغلطة دي تاني
    لقيت نفسك عملت حاجات كتير صح وخير وده صعب.. بس حلو قوي.. اثبت على كده يا عم.. ودرب نفسك على فعل الخير وحب عمله
    يعني في الحالتين إنت كسبان كسبان..
    محاسبة النفس دي زي كده ما الواحد يكون عنده قميص مش نضيف.. وبعدين يغسله
    بمسحوق معتبر.. بعدها يرجع أبيض زي الفل.. زي الأول بالظبط.. صحيح القميص
    ممكن يتوسخ تاني.. بس ممكن برضه مايتوسخش.. والأهم.. إنه رجع أبيض
    *******


    *********************************
    احكِى لنا وقل لنا
    قعدت مع نفسك قبل كده وحاسبتها
    والنتيجة كانت إيه طيب؟
    ولو قعدت دلوقتي مع نفسك..
    وعملت معاها كشف حساب
    يا ترى هتقول إيه والنتيجة هتكون إيه؟
    *******

    شمس لا تغيب
    ¦¤(MOSHRFA MOSHKILA)¤¦
    ¦¤(MOSHRFA MOSHKILA)¤¦

    انثى
    عدد الرسائل : 833
    العمر : 28
    بتشتغل ايه يا عم : طالبه
    مودك ايه؟ : هطق من الغيظ بس
    السٌّمعَة : 0
    نقاط : 0
    تاريخ التسجيل : 06/04/2008

    رد: مراية...ونتيجه...وساعه

    مُساهمة من طرف شمس لا تغيب في الأربعاء مايو 28, 2008 8:06 pm

    اولا بجد الموضوع رووووووووووعه يا ايمي ميرسي بجد عليه يا عسل

    تاني حاجه مفيش انسان مش بيعد مع نفسه كل الانسان عارفه نفسه اكتر من اي حد تاني وبيعد مع نفسه ويحاسب نفسه ياتري الي عملته النهارده صح ولا غلط بس في ناس مهما عملت عمرها ما تعترف بغلطها وفي ناس عارفه انها مليانه عيوب بس بيحاولو مع نفسهم ومهما دول الناس الي بجد الي نفسهم يغيروا من انفسهم بس محتاجين شويا وقت وصبر

    اما انا يا سيتي عشان خاطرك بس عزمت نفسي علي الغدي النهارده واعد ادردش معاها وطلعت منها كلام يالهوي فين وفين علي بال ما نطقت ههههههههههههههه

    لا بجد انا واحده من الناس زي ما فيا مميزات فيا عيوب وبحاول وبجد اغير من نفسي انا مش هبقي يعني مش فيا ولا عيب كلنا فينا عيوب ومفيش حد معصوم من الغلط غير رسول الله ( صلي الله عليه وسلم)

    وكلنا بنغلط بس في بردوا ناس تغلط وبعدين تندم انها غلط ودول فيهم امل

    لكن الناس الي بتغلط وهيا اساسا مفكره انها مش بتغلط خالص فدول ربنا يهديهم بجد صعب اوي ان الانسان ميكنش حاسس انه فيه عيب او ان بيغلط في حق نفسه حق اصحابه اهله دا صعب يتغير

    اي انسان عنده استعداد انه يعد مع نفسه ويكلمها ويعرف الغلط فيه هيتغير بس دا لو كان هوا نفسه مقتنع بكدا لو مش مقتنع ولا اي حد في الدنيا هيقدر يغيروا لازم هوا الي يغير نفسه بنفسه

    وانا والله بعمل كدا مع نفسي وغيرت حاجات كتير فيا كانت غلط وان شاء الله بحاول في البااااقي

    ومعلش بقي اني كل مره بتطول عليكم انا مش غلباويه خالص صدقوني ههههههههههههههه

    وميرسي تاني مره يا عسل علي موضوعك العسل دا

      الوقت/التاريخ الآن هو الأحد ديسمبر 04, 2016 5:13 pm