بلغني أيها الملك حسحس
ذو العقل المفسفس
والمخ المهيس
إن جارنا عتريس
جه لبنت عريس
شكله سواق أتوبيس
وسمعت زغروطة
عملت مبسوطة
ورحت ابارك وأهني
وأعدت أرقص وأغني
ورميت وداني معاهم
أتجسس على نجواهم
أتاري البت نجوى
الواد ادالها عجوة
وخدعها وهب سهوة
مضاها عقد عرفي
شايف البنات ياقرفي
والبت ياعين امها
بتحب العجوة اصلها
كل ما تحن إليها
تروح بيته لوحديها
وطبعا الشيطان
كان تالت الحلوين
ولسه هايوزهم
لقاهم موزوزين
قبل ما يقول
تعالو
راحم على طول جايين
والبت يا عين امها
كبرت أوام بطنها
وبلغوا النيابة
وقالم اغتصاب
وقالوا الواد خرابة
خدرها بالكباب
خرابة قال كدابة
وفز وجاب ربابة
وغنى
ليه يا نجوى بتكذبي * مش عارفة ان الكذب حرام
مش خايفة يوم تتعذبي * قولي الصدق بلاش أوهام
بص يا باشا البت نجوى * بصراحة كده بتحب العجوة
واحنا ياباشا كاتبين عرفي * شرعي يا باشا شرعي وشرفي
عم الشيخ سحلول امبارح * قال في قناة البلح الطارح
إن العرفي يا باشا حلال * واسأل كل الناس فس القهوة
بس بشرط عملته ياباشا * إن المهر يكون كيلو عجوة