أنا حبيت أكتب كلام عن الحب بس من واقع الحياة واللى انا شايفاه وحاساه
وعايزة كل حد يدخل الموضوع يقرأ كل كلمة كويس ويستحمل طول الموضوع
عشان الموضوع طويل بس مهم أوى وممكن ناس كتير تستفيد
قبل ماأبدأ كلامى عايزة أذكر جملة سمعتها قبل كده وحستها جدا :
(التعبير عن الحب أهم من الحب نفسه)
عايزين نتكلم عن الحب بكل أنواعه ونربط الأنواع دى بالجملة دى
أولا:
حب الله:
أنا مش داعية اسلامية ولا أنا عايزة أتفلسف والله 0وفى ف حياتى حاجات كتير غلط ولازم تتغير 0
بس فيه كلام حبيت انى أكتبه ممكن يكون معروف عند ناس فاحنا نوصله للناس اللى مش عارفاه
أى حب فى الدنيا لازم يترجم لأفعال ايه هى الأفعال اللى تترجم حبنا لربنا
0 طبعا أول حاجة المواظبة على الصلاة وقراءة القرأن والصوم والزكاة والشهادة والحج لمن استطاع ودى أركان الاسلام طبعا
وكمان حبنا لربنا لازم يترجم فى كلمات ويتعبر عنه وده هيكون بكثرة الدعاء وأهم شرط لاستجابة الدعاء التذلل لله فى لحظة التذلل دى هتحس انك قريب أوى من ربنا
فيه عبارة دايما بنقولها ونسمعها دايما لما حد يحاول يخوفنا بنقول احا مبنخافش غير من اللى خلقنا
لو فعلا احنا أدركنا العبارة دى عمرنا ماهنغضب ربنا فى أى فعل أو فى معظم الأفعال
لو نفضل نفكر فى ربنا وعقاب ربنا طول الوقت الشيطان مش هيلاقى مدخل يقدر يدخلنا منه
أنا عن تجربة شخصية ماعرفتش اواظب على الصلاة الا لما حسيت معنى الجملة دى وبقيت بخاف ومعرفش انام ولا اخرج من بيتى الا لما اصلى
وأخيرا عشان تكون محب لله وطائع وعابد لابد من الخوف من الله ومجاهدة النفس ومحاسبتها0
ثانيا:
حب الأم:
الأم أغلى انسانة فى الدنيا وحبنا ليها أكيد مهم بس ازاى نعبر عن الحب ده طبعا لازم طاعتها الدائمة ولو فيه أمر مش قادر تنفذه ناقشها فيه واياك تنام وهى زعلانة منك
ليه دايما متقولش لوالدتك (بحبك)جرب روح بوس ايدها ونام فى حضنها وقولها بحبك أوى يا ماما وشوف هتحس بايه
امسك خدودها ولا عبها وقولها عبارات دلع وبوس راسها
ياريت محدش ياخد الكلام باستهزاء ومينفذش عايزة أى حد يقرا الكلام ينفذه ويجى يكتب حس بايه
ثالثا:
الحب بين القرايب:
أنا مش هتكلم كتير فى النوع ده أنا هحكى عن واحدة قريبتى وف نفس سنى تقريبا
ومن واحنا أطفال بنلعب مع بعض وبحبها جدا ومتأكدة انها هى كمان بتحبنى
بس مشاعرها جافة جدا ومبتسمعنيش كلام حلو خالص وكل كلامها جارح حتى سلامها فيه فتور لو غبت عنها شهور
تفتكروا انى هفضل استحمل كتير ممكن افضل احبها بس اكيد مش هيبقى بنفس الدرجة واكيد مع الوقت مش هابقى عايزة اشوفها كمان
ياجماعة جفاء المشاعر وتبلدها ده شىء صعب جدا والله وبيجرح جامد0
الحب احساس وابسط حاجة تعبر بيها عن حبك لأهلك وقرايبك انك تسأل عليهم ومتجرحهومش وتهتم بيهم لان الانسان بلا أهل ميقدرش يعيش
نصيحة لاى انسان مقصر فى حق قرايبه ومش بيسأل عليهم
أو حتى بيشوفهم وبيعاملهم وحش يغير اسلوبه قبل ما يلاقى نفسه لوحده وعمره ما هيستحمل الوحدة واحنا مش عارفين ربنا مخبيلنا ايه
رابعا:
الحب بين الأصدقاء:
الصديق أجمل حاجة بيفرح بيها الانسان واقوى العلاقات الانسانية وأول شخص بيختاره الانسان بمحض ارادته
والانسان لو وجد صديق مخلص ووفى يقدر يعوضه عن فقدان أو ظلم العالم كله ازاى نقدر بأه نحافظ على صديقنا ونعبر له عن حبنا
لازم أولا تكون مستمع جيد لصديقك واهتمامك بموضوعه يبقى أكتر من اهتمامه هو شخصيا
وتشاركه فرحه وحزنه ولو العالم كله وقف ضده تقف انت جنبه وتقويه عشان يقدر يواجه أزمته
ومش هيحصل حاجة لما تقوله انك بتحبه وانك سعيد بوجوده فى حياتك
خامسا:
حب الزوج أو الزوجة:
ليه دايما قبل الزواج بيبقى كلام الحب كتير اوى وبندور على أى حاجة جديدة نسعد الطرف الأخر بيها وبعد الزواج بتختفى كل الحاجات الجميلة دى
مش الزوج والزوجة دول هما اللى كانوا الحبيب والحبيبة قبل الزواج
أى زواج بيمر بمشاكل وظروف صعبة 0
ايه هيخلى أى مشاكل تعدى كانها نسمة أكيد كلام الحب هو الحاجة الوحيدة اللى هتبقى حلوة فى ظل المشاكل دى
*لنفرض مثلا زوج أثناء شجاره مع زوجته لقاها علت صوتهاوقالتله (بحبك)ايه هيكون رد فعله
أكيد مش هيروح يضربها بالعكس أعتقد انه ساعتها هيهدى وممكن يضحك كمان
وطبعا مش شرط الزوجة هى اللى تعمل كده ليه ميكونش الزوج
مش هتفرق مين هيبدأ
وفى النهاية
ياريت أى حد بيحب أى شخص فى العالم أم0زوج0قريب 0صديق ميبخلش عليه بكلمة حب حلوة ممكن تفرق فى حياتك وحياته كتير
